XIII Concurso de microrrelatos e micropoemas
Centros educativos da Estrada_Dinamizaestrada
Participación e prazos.
Poden participar alumnos e alumnas dos centros educativos do concello da Estrada: CEIP Pérez Viondi, CEIP Cabada Vázquez, CPR Plurilingüe N. S. de Lourdes, CEIP Plurilingüe de Oca, CEIP do Foxo, CEIP Figueiroa, CEIP Manuel Villar Paramá, IES Avelina Valladares, IES Manuel García Barros e IES Plurilingüe Antón Losada Diéguez.
Os traballos entregaranse en formato A4 nun sobre con nome, apelidos e curso, nos centros respectivos. O prazo límite para entregar os textos rematará o 27 de febreiro de 2026.
Modalidades
Poderase participar nunha modalidade ou nas dúas que seguen, pero cada participante só poderá presentar un texto por cada unha delas.
Categorías A: Educación Primaria A1: 1º e 2º A2: 3º e 4º A3: 5º e 6º B: Educación Secundaria B1: 1º e 2º ESO B2: 3º e 4º ESO, Ciclos Básicos C: Bacharelato, Ciclos Medios e Ciclos Superior.
Premios
Un xurado, formado por un/unha representante dos Equipos de Dinamización Lingüística dos diferentes centros, concederá un premio por modalidade, categoría e centro. Valorarase a creatividade, a orixinalidade e calidade lingüística e literaria. Os traballos premiados poderán ser publicados pola entidade organizadora e poderán publicarse tamén nas páxinas web dos centros e nas revistas escolares.
Microrrelatos O texto presentado debe estar en galego e non conter máis de 100 palabras, para calquera das categorías. A temática será libre, pero debe aparecer necesariamente a palabra AZUL.
Micropoemas O texto presentado debe estar en galego e constar dun mínimo de dous versos e máximo de oito na categoría de Primaria, e un mínimo de catro e máximo de oito versos no resto das categorías. A temática será libre, pero debe aparecer necesariamente a palabra NOITE.
