PARLADOIRO CON ESTHER ESTÉVEZ

Esther Estévez é unha xornalista galega, coñecida como presentadora do programa de divulgación lingüística Dígocho eu da TVG. Despois de estudar xornalismo na Universidade de Santiago de Compostela, comeza a traballar na Área de información da TVG onde empeza a presentar este programa no ano 2020. Un programa dirixido de xeito especial á xente nova que se difunde a través tamén de redes sociais como You Tube, Instagram e Tik Tok. Dende o ano 2021, Esther presenta Dígocho eu no twich da CRTVG con dous programas semanais: o primeiro, "O reto do #DígochoEu#, onde realiza entrevistas e probas lingüísticas a personaxes relevantes galegofalantes; e o segundo, o "Apuntamento lusófono", que presenta xunto co actor portugués Rodrigo Paganelli. O 19 de marzo de 2022, Esther recibiu o premio Mestre Mateo á mellor comunicadora na 20 edición destes prestixiosos premios. Un acto onde o seu programa tamén recollería o galardón ao mellor programa de televisión. Neste Parladoiro que se celebrou hoxe, 15 de decembro, no Teatro Principal, ademais de falar sobre o tema lingüístico, Esther amosounos ese lado persoal que se agocha detrás da presentadora. Diversos alumnos dos centros educativos da Estrada tiveron a oportunidade de preguntarlle aquilo que querían saber, ao que Esther respostou con espontaneidade e sempre, sempre, animándoos a farlar en galego. Aquí tendes unha foto da representación do noso cole, que dende logo, lembrará durante moito tempo este encontro que nos deixou tan bo sabor na lingua.

De esquerda a dereita: Rafa, Lois, Carmen, Esther, Carme e Irene.

VÍDEO DE A GALIÑA AZUL DO ALUMNADO DE 6ºC

Aquí tendes a actuación dos nenos de 6ºC no Certame de teatro escolar Olimpio Arca. Noraboa aos participantes!

 

FOTOS DA FESTA DA POESÍA

 Pois a Festa da Poesia xa pasou e aquí vos quedan estas fotos  para que poidades ver o vistosos que quedaron os participantes, tanto as nenas que recitaron os poemas de terror e romanticismo coma os que fixeron a poción máxica para ser un bo poeta! Así fixemos mención aos xéneros máis comúns dos que se serve o cine, tema central do Proxecto Documental Integrado deste ano. Luces, cámara e acción!!

O presentador, Xosé Lueiro:

Os nenos e nenas do Ceip de Figueiroa en acción:

O gañador deste ano do certame Avelina Valladares de poesía por segundo ano consecutivo: Manuel López Rodríguez,

Aquí tendes unha pequena mostra do ben que o fixeron os nosos recitadores:

Moitas grazas ás familias pola súa colaboración  e que viva a poesía!

FESTA DA POESÍA

 Hoxe participaremos co noso Poemario de Cine á Festa da Poesía, que será no Teatro Principal ás oito da tarde. Vémonos alí!

NOVO LIBRO DE XOSÉ LUNA

 Velaquí tendes o  novo libro do noso veciño e amigo Xosé Luna. Podedes asistir á súa presentación, que terá lugar o luns 5 de decembro ás 19:00 horas no Liceo de Ourense (Rúa Valentín Lamas Carbajal, 5).

PARTICIPARÁN NO ACTO DE PRESENTACIÓN:

JOSÉ LUIS TROITIÑA MOTA

Xerente do Liceo

ARMANDO REQUEIXO 

Profesor, escritor, investigador e crítico literario 

BEATRIZ QUINTELA

Directora do IES nº1 da Estrada

OLAYA NAVEIRA

Ilustradora do libro

VALENTÍN GARCÍA

Secretario Xeral de Política Lingüística da Xunta de Galicia

XOSÉ LUNA

Autor do libro 

RECITAL MÚSICO POÉTICO

MARÍA DO CEO

MANOELE DE FELISA

JAVIER MIRANDA

Música en directo

ALUNMNADO DO CEIP A PONTE

ALUMNADO DO CEIP VIRXE DA PENA DA SELA

O acto será presentado por Susana Godoy

(mestra do Ceip A Ponte)

ESTADES TODOS/AS CONVIDADOS/AS A ESTE EVENTO TAN IMPORTANTE PARA AS NOSAS  LETRAS!

MOSTRA DE TEATRO DON OLIMPIO ARCA

 Hoxe asistimos, un ano máis, a unha nova edición do teatro escolar Olimpio Arca. Os nenos e nenas do noso colexio representaron unha adaptación do conto de Carlos Casares, aproveitando que onte foi o 20 aniversario do seu falecemento. Aquí tendes algunhas fotos desta magnífica actuación dos nenos e nenas de 6ºC, baixo a dirección da profe Celeste e o apoio musical da profe Rebeca. 

 Aquí tendes a gravacións de diferentes momentos da actuación:

Estupendo traballo, rapaces e rapazas!

CERTAME DE TEATRO ESCOLAR OLIMPIO ARCA

 O vindeiro martes, día 29 de novembro, temos unha cita no Teatro Principal para asistir ás actuacións teatrais dos nosos compañeiros dos outros centros educativos do noso concello. Nós imos interpretar unha adaptación de A galiña azul, de Carlos Casares. Os encargados son os magníficos actores e actrices de 6º C de EP, baixo a dirección da profe Celeste.  Estades todos convidados/as a achegarvos ata o teatro!

Colaboracións do Samaín

 Estes días de Samaín aproveitamos para visitar aos nosos amigos e amigas e deixarlles as divertidas postais que fixemos entre todo o alumnado. E nós tamén recibidos postais bonitas, velaquí tendes unha mostra!

O vindeiro ano seguiremos agasallándovos coas nosas postais e tamén estaremos encantados de recibir as vosas, compañeiros!

Parladoiro con Ledicia Costas

 O pasado venres, 21 de outubro, asistiron dúas alumnas representando ao Ceip de Figueiroa ao Parladoiro que tivo lugar no Teatro Principal e que desta vez contou coa presenza da escritora Ledicia Costas. Elas fixéronlle unha pregunta cada unha sobre a súa obra. A continuación asinou nun libro da nosa biblioteca e tamén nos de Uxía e Irene, as nosas representantes.  

O decorado do escenario lembraba o ambiente fúnebre de moitos dos seus libros.

 

 Asinando no noso libro da biblioteca:

Graciñas, Ledicia! Coidarémolo moito! Ata outro parladoiro!

Unidade didáctica do Magosto

 Estes días estámonos preparando para a celebración do Samaín e do magosto.. Pasarémolo moi ben, pois poderemos vir disfrazados-as cando festexemos  o Samaín ( o 28 de outubro) e   comer castañas cando sexa o Magosto (o 11 de novembro). Aquí tendes unha unidade didáctica relativa ao magosto, para ir degustando este produto tradicional galego deste tempo de outono.

Benvida do EDLG e acceso a Unha lingua guapa

 Que tal? Como vai todo? Este ano comezamos con máis forza ca nunca! Despois destes anos de pandemia, parece que por fin imos poder desenvolver o noso proxecto dunha maneira un pouco máis normalizada. Sabemos que aínda temos que obrar con cautela pero polo menos xa imos poder participar de maneira presencial en actos que pasaron a ser virtuais estes dous últimos cursos. Esperemos que isto non se torza e poidamos ter un ano de colaboracións satisfactorias para todos-as!

Este ano o Proxecto Documental Integrado está adicado ao cine. Dende o noso equipo, queremos promocionar e dinamizar a lingua galega, como idioma válido en tódalas situacións da nosa vida. Neste  apartado, como en moitos outros, aínda queda moito por facer, pero para iso estamos nós aquí, por iso adaptamos o eixo vertebrador, que é o cine, as nosas actividades e diferentes intervencións e denominámolo Unha lingua de cine. Tendes as entradas? Pois veña, que entramos, todos-as somos benvidos-as!!

E que mellor maneira de comezar que indo, precisamente, a ver unha película. Esta non é unha película calquera, é moi especial, porque trata das orixes da lingua galega. Realizouna un colexio de Moraña a partires dunha idea de Fina Casalderrey. 

Seguro que vos vai gustar e ides aprender un montón! Preparados-as!!

OBRADOIRO CAMIÑO CIRCULAR

 Hoxe, e para pechar as actividades relativas a este curso, veunos visitar Mar, da cooperativa estradense Camiño Circular. Ademais de pasalo moi ben, aprendemos moitas cousas dos produtos que se están elaborando no noso concello e moitos dos cales son descoñecidos para nós. Asi, puidemos ver que a nosa contorna produce leite, queixos, ovos, marmelada, mel, aceite, rosquillas, amorodos desecados,.. e todo da máxima calidade. Tamén, Mar explicounos a importancia que ten mercar na nosa zona, pois isto é moi importante para a dinamización do rural. 

E como para crer hai que ver, ou mellor dito, probar, tróuxonos unha morea de produtos riquísimos dos que demos conta en tempo de nada, pois era case a hora do recreo e a fame xa se facía notar. E por riba, con estas cousas tan ricas.. Mirade, mirade.. A que se vos fai a boca auga?

                                       Primeiro comezamos coas explicacións.

Despois, Mar entregoulle ás gañadoras do concurso de Camiño Circular, Carme e Sara,  no que participamos a principio de curso, unha sorpresa que lle tiñamos reservada dende o colexio.

 Así quedou a foto de familia:

E cando rematamos e ollamos o que había nas mesas...

..                                       non puidemos resistirnos e atacamos! 

Hummm! Que rico! Certamente, este obradoiro deixounos moi bo sabor de boca! Xa sabedes que os produtos co selo da Estrada teñen un plus de calidade engadido. Hai que probalos! E con isto despedímonos ata o vindeiro curso!! Felices vacacións a todos/as. E lembrade que hai que seguir dinamizando a lingua galega!

VÍDEO DA FESTA DAS PALABRAS

Xa puidestes ver as fotos da Festa das Palabras, pero se picades neste enlace podedes ver o vídeo que nos pasaron dende o Concello. Seguro que vos gusta! 

                                          Festa das Palabras

FESTA DAS PALABRAS

 O pasado mércores, 25 de maio de 2022, celebramos a novena edición da Festa das Palabras. Esta vez puideron asistir de maneira presencial tódolos gañadores e gañadoras, que escoitaron as palabras agarimosas da madriña, Rosalía Morlán. Tamén contamos coa actuacion do grupo cuntiense Favorita, que amenizou coa súa música o evento das letras, Aquí tendes as fotos desta festa tan especial e esencial para fomentar a creatividade entre os novos escritores e escritoras. Parabéns a todos/as!