Páxinas

martes, 22 de novembro de 2022

CERTAME DE TEATRO ESCOLAR OLIMPIO ARCA

 O vindeiro martes, día 29 de novembro, temos unha cita no Teatro Principal para asistir ás actuacións teatrais dos nosos compañeiros dos outros centros educativos do noso concello. Nós imos interpretar unha adaptación de A galiña azul, de Carlos Casares. Os encargados son os magníficos actores e actrices de 6º C de EP, baixo a dirección da profe Celeste.  Estades todos convidados/as a achegarvos ata o teatro!



mércores, 2 de novembro de 2022

Colaboracións do Samaín

 Estes días de Samaín aproveitamos para visitar aos nosos amigos e amigas e deixarlles as divertidas postais que fixemos entre todo o alumnado. E nós tamén recibidos postais bonitas, velaquí tendes unha mostra!





O vindeiro ano seguiremos agasallándovos coas nosas postais e tamén estaremos encantados de recibir as vosas, compañeiros!


domingo, 23 de outubro de 2022

Parladoiro con Ledicia Costas

 O pasado venres, 21 de outubro, asistiron dúas alumnas representando ao Ceip de Figueiroa ao Parladoiro que tivo lugar no Teatro Principal e que desta vez contou coa presenza da escritora Ledicia Costas. Elas fixéronlle unha pregunta cada unha sobre a súa obra. A continuación asinou nun libro da nosa biblioteca e tamén nos de Uxía e Irene, as nosas representantes.  

O decorado do escenario lembraba o ambiente fúnebre de moitos dos seus libros.




 

 Asinando no noso libro da biblioteca:





Graciñas, Ledicia! Coidarémolo moito! Ata outro parladoiro!



mércores, 19 de outubro de 2022

Unidade didáctica do Magosto

 Estes días estámonos preparando para a celebración do Samaín e do magosto.. Pasarémolo moi ben, pois poderemos vir disfrazados-as cando festexemos  o Samaín ( o 28 de outubro) e   comer castañas cando sexa o Magosto (o 11 de novembro). Aquí tendes unha unidade didáctica relativa ao magosto, para ir degustando este produto tradicional galego deste tempo de outono.

Benvida do EDLG e acceso a Unha lingua guapa

 Que tal? Como vai todo? Este ano comezamos con máis forza ca nunca! Despois destes anos de pandemia, parece que por fin imos poder desenvolver o noso proxecto dunha maneira un pouco máis normalizada. Sabemos que aínda temos que obrar con cautela pero polo menos xa imos poder participar de maneira presencial en actos que pasaron a ser virtuais estes dous últimos cursos. Esperemos que isto non se torza e poidamos ter un ano de colaboracións satisfactorias para todos-as!

Este ano o Proxecto Documental Integrado está adicado ao cine. Dende o noso equipo, queremos promocionar e dinamizar a lingua galega, como idioma válido en tódalas situacións da nosa vida. Neste  apartado, como en moitos outros, aínda queda moito por facer, pero para iso estamos nós aquí, por iso adaptamos o eixo vertebrador, que é o cine, as nosas actividades e diferentes intervencións e denominámolo Unha lingua de cine. Tendes as entradas? Pois veña, que entramos, todos-as somos benvidos-as!!

E que mellor maneira de comezar que indo, precisamente, a ver unha película. Esta non é unha película calquera, é moi especial, porque trata das orixes da lingua galega. Realizouna un colexio de Moraña a partires dunha idea de Fina Casalderrey. 

Seguro que vos vai gustar e ides aprender un montón! Preparados-as!!


luns, 20 de xuño de 2022

OBRADOIRO CAMIÑO CIRCULAR

 Hoxe, e para pechar as actividades relativas a este curso, veunos visitar Mar, da cooperativa estradense Camiño Circular. Ademais de pasalo moi ben, aprendemos moitas cousas dos produtos que se están elaborando no noso concello e moitos dos cales son descoñecidos para nós. Asi, puidemos ver que a nosa contorna produce leite, queixos, ovos, marmelada, mel, aceite, rosquillas, amorodos desecados,.. e todo da máxima calidade. Tamén, Mar explicounos a importancia que ten mercar na nosa zona, pois isto é moi importante para a dinamización do rural. 

E como para crer hai que ver, ou mellor dito, probar, tróuxonos unha morea de produtos riquísimos dos que demos conta en tempo de nada, pois era case a hora do recreo e a fame xa se facía notar. E por riba, con estas cousas tan ricas.. Mirade, mirade.. A que se vos fai a boca auga?

                                       Primeiro comezamos coas explicacións.





Despois, Mar entregoulle ás gañadoras do concurso de Camiño Circular, Carme e Sara,  no que participamos a principio de curso, unha sorpresa que lle tiñamos reservada dende o colexio.







 Así quedou a foto de familia:



E cando rematamos e ollamos o que había nas mesas...



..                                       non puidemos resistirnos e atacamos! 




Hummm! Que rico! Certamente, este obradoiro deixounos moi bo sabor de boca! Xa sabedes que os produtos co selo da Estrada teñen un plus de calidade engadido. Hai que probalos! E con isto despedímonos ata o vindeiro curso!! Felices vacacións a todos/as. E lembrade que hai que seguir dinamizando a lingua galega!


























xoves, 2 de xuño de 2022

VÍDEO DA FESTA DAS PALABRAS

Xa puidestes ver as fotos da Festa das Palabras, pero se picades neste enlace podedes ver o vídeo que nos pasaron dende o Concello. Seguro que vos gusta! 


                                          Festa das Palabras

luns, 30 de maio de 2022

FESTA DAS PALABRAS

 O pasado mércores, 25 de maio de 2022, celebramos a novena edición da Festa das Palabras. Esta vez puideron asistir de maneira presencial tódolos gañadores e gañadoras, que escoitaron as palabras agarimosas da madriña, Rosalía Morlán. Tamén contamos coa actuacion do grupo cuntiense Favorita, que amenizou coa súa música o evento das letras, Aquí tendes as fotos desta festa tan especial e esencial para fomentar a creatividade entre os novos escritores e escritoras. Parabéns a todos/as!




















 

venres, 27 de maio de 2022

mércores, 18 de maio de 2022

ACTIVIDADE LETRAS GALEGAS 6ºB EP

 Con motivo desta celebración desta data tan especial, os alumnos de 6ºB fixeron este vídeo dun poema del que se titula Muiñada. Mirade que bonito:

martes, 17 de maio de 2022

CORRELINGUA 2022

 O pasado xoves asistimos ao Correlingua. Despois de dous anos celebrándoo no colexio, por fin puidemos celebrar a festa da lingua e reivindicar o noso idioma polas rúas da Estrada. Desfrutamos moito bailando ao son dunha banda de rock e coa presentación de Isabel Risco. Velaquí tendes as fotos do evento.
















Aquí aprézanse os dorsais realizados para a ocasión: 




                                Ata o vindeiro ano, Correlingua!