VÍDEO DA VIII EDICIÓN DA FESTA DAS PALABRAS

 Aínda que xa sabedes que foi un acto simbólico, isto non quere dicir que non estiverades representados tódolos gañadores e gañadoras. Para que poidades velo na casa, queda aquí posto o vídeo do devandito acto. Seguide o enlace:

Festa das palabras 2021.

Gañadores do concurso de vídeo!!

 

Xa están aquí os nenos e nenas de 5ºB dispostos a contarvos como foi iso de que atoparon a vacina para inmunizarnos co galego, que era o lema do concurso de vídeo do Correlingua. Parece que deron coa fórmula perfecta, pois gañaron! O premio vai ser unha actuación musical no noso colexio que terá lugar os derradeiros días deste curso ou para o principio do que vén. Sodes fantásticos!

ROSALÍA MIX

 Por fin realizamos a gravación de dous poemas de Rosalía de Castro para empregar como podcast na radio escolar. Queredes escoitalos? Xa veredes que ben recitan os nenos e nenas de 4ºB!! Picade no enlace:

ROSALÍA MIX

VISITA DE XOSÉ LUNA

 Esta semana  tivemos unha festa literaria no cole. O escritor, mestre e veciño noso Xosé Luna tivo a ben visitarnos para xogar con nós ás palabras fermosas. E esas palabras, non podía ser doutra maneira, aparecían na extensa obra literaria deste escritor prolífico.Pero, como unha imaxe vale máis que cen palabras, aí tendes algunhas deste reencontro que foi, sobre tódalas cousas,  emotivo, divertido e enriquecedor para nós.

En primeiro lugar, foi recibido no patio polos alumnos de 5º e 6º de EI, que cantaron, bailaron e recitaron poemas escritos por el.

Despois foi á aula de 3ºB de EP para ensinarlles a obriña de teatro que fixeran facía uns días e que se chama Ratalinda da Estrada (podédela ver neste blog) e tamém xogaron un pouco coas (súas) palabras cheas de arte e significados que non coñeciamos.

A continuación baixou para a biblioteca e aproveitamos para que lle entregara o libro aos gañadores e gañadoras do VII concurso de relatos e poemas -da que el era o padriño-  xa que no Teatro Principal só puidemos celebrar un acto simbólico

E aquí están todos xuntos:

A continuación, co alumnado de sexto fixo un fermoso obradoiro con palabras das súas obras que estaban escritas nuns bonitos corazóns de madeira e que viñan nunha caixa máxica, claro!

Tamén aproveitou para facer unha chamada..sabedes a quen? Nin mais nin menos que a Manoele de Felisa, que puxo música e voz aos seus poemas de A Estrada da Vida e que quedou convidado a vir ao noso colexio proximamente.

Este alumno fixo un retrato chulísimo de Xosé, que pousou nesta foto con el. Na mesa podedes ver os corazóns dos que vos falaba antes.

Nós tamén quixemos que el vira algo noso e escoitou o rap RapeANDO  co galego que fixeran os alumnos de 6º durante o primeiro trimestre.

Por último, unha foto coas alumnas que estiveron traballando para que todo saíse ben.  

E aínda que Xosé tivo que marchar, o cartel de benvida que realizaron os nenos e nenas de 6º A quedou presidindo a nosa biblioteca durante uns días. Moitas grazas por facernos pasalo tan ben e aprender tanto contigo! Que vivan as palabras!  Ata pronto!

rapeANDO novembro 2020

Xa fai uns meses que o  alumnado de sexto lle cantou  a modo de rap á lingua galega:

A que teñen razón? 😉

RATA LINDA DA ESTRADA

Ola, nenos e nenas! Que tal estades neste tempo previo ás vacacións?

Os alumnos de 3º B de EP traballaron arreo para facer esta representación adaptada ao noso colexio da famosa obra Ratalinda de Compostela. Mirade que lucido lles quedou a estes actores e actrices que están dirixidos pola profe Helena, a súa titora!

VÍDEOCONFERENCIA CO LOSADA

 Hoxe á mañá puidemos levar a cabo unha actividade que vimos realizando tódolos anos: unha vídeoconferncia co IES Antón Losada Diéguez. O alumnado de sexto de EP explicoulle ao de terceiro da ESO como fixeron un proxecto durante o primeiro trimestre do curso que consistiu en realizar circuítos eléctricos. Explicáronlles tamén que maqueta elexíron para integrar unha lámpada e que significado tiña para eles. Tamén, compartindo  pantalla, puideron ver un vídeo co produto final de cada un. Queremos seguir con esta actividade para o vindeiro ano, pois foi moi interesante para ámbalas dúas partes. Ata pronto, compañeiros do Losada. 

CELEBRACIÓN DA VIII EDICIÓN DA FESTA DAS PALABRAS

 Hoxe tivemos no Teatro Principal o acto simbólico da Festa das Palabras correspondente a este curso. Foi un acto sinxelo pero cargado de emotividade. Debido ao protocolo do covid non puideron asistir tódolos gañadores e gañadoras e foi elixido ao chou Brais Nogueira, da aula de 6º B de Educación Primaria. El e máis a coordinadora do EDLG foron os encargados de representar ao noso colexio para recoller o diploma de participación e un dos libros cos que serán agasallados os pequenos escritores e escritoras que o encheron de palabras bonitas relativas a lindos cabalos que galopan polo mundo das letras. Aquí tendes a fotografía que aparece no libro e os textos correspondentes ao mesmo. A continuación tendes unha pequena biografía de Xosé Luna, o noso veciño, mestre e escritor, que tivo a ben apadriñar esta festa tan importante para o mundo da literatura en lingua galega por ser berce de actuais e futuros escritores e escritoras. 

Nomes de esquerda a dereita:

Daniel Rey Louzao, Brais Nogueira Corral, Xulia Abet Matalobos, Iria Miguéns Otero, Ignacio Eiras Alonso, Carme Valentina Iglesias Sánchez.

Todos eles tiñan que estar presentes para recoller o libro asinado por Xosé Luna. Como non puido ser e xa que a semana que vén temos a sorte de recibilo no noso colexio, aproveitaremos para facerlles a homenaxe que merecen.

Para que poidades desfrutar, velaquí os poemas e relatos gañadores:

CATEGORÍA A1

Lindo cogomelo,

que me gusta ao comelo.

Daniel Rey Louzao

2º EP

CATEGORÍA A2

Pensei todo o día,

pensei toda a noite,

e coa palabra lindo

ningún poema se me ocorre.

Ignacio Eiras Alonso

3º EP

CATEGORÍA A3

Que lindo é o teu sorriso

que lindo é o teu cantar,

que cada vez que te escoito

entran ganas de bailar.

Pero o que sinto de veras

é non saber tocar

algún instrumento calquera

para poderte acompañar.

Iria Miguéns Otero

6ºB

RELATOS

CATEGORÍA A1

Había unha vez un cabalo que estaba só nun prado e veu unha egua que era moi guapa. El quería casar con ella. Como o cabalo sempre estaba sucio, ocorréuselle unha idea e dixo:”xa sei, podo encherme de lama e despois podo poñerme purpurina”. E a egua dixo: “tes que lavarte máis, a min non me enganas, ti estás sucio e non estás limpo”. O cabalo lavouse porque quería namorar á egua. Ela namorouse del e finalmente foron noivos. E foron á praia dos cabalos a correr.

Xulia Abet Matalobos.

2º EP

CATEGORÍA A2

Catro cabalos diferentes

Érase unha vez un cabalo de ouro, outro de prata, outro de coloríns e tamén un cabalo marrón moi normal. O cabalo marrón quería ser especial, pois os outros tres cabalos non eran normais.

Un día, o cabalo marrón pediu un desexo.

Ao día seguinte o cabalo marrón xa non era desta cor, senon un cabalo verde lima fermoso. Dende entón foi moi feliz.

Carme Valentina Iglesias Sánchez

CATEGORÍA A3

Os meus cabalos

Teño dous cabalos simples, normais, sucios,.. Pero eles teñen unha cousa en peculiar, porque cando eu subo neles, sinto que aparezo noutro mundo no que os cabalos son brancos, limpos e aparte.. poden voar! Xogamos xuntos, doulles de comer..! Pero os meus amigos non me cren. Din que estou tolo, que deixe de soñar..! Pero dame completamente igual, porque eu vino, eu vivino.

Brais Nogueira Corral.

6º EP

                                       

Todos eles están recollidos neste marabilloso libro ao que a deseñadora Rosa de Cabanas lle fixo unha portada e unha contraportada moi "lindos"

 

E non podemos esquecernos dos ilustradores  de Educación Infantil que corresponden ao noso centro:

Aquí podedes ver algúns momentos importantes da celebración:

O discurso do padriño.

A foto con tódolos representantes dos centros.

O alumno que representou ao noso colexio e a coordinadora do EDLG con Xosé Luna.

Aínda non rematamos a Festa das Palabras. O martes seguimos con ela no Ceip deFigueiroa!