GAÑADORES E GAÑADORAS DA IX EDICIÓN DO CONCURSO DE MICRORRELATOS E MICROPOEMAS

A estas alturas do curso xa coñecemos os nomes dos gañadores e gañadoras do concurso de microrrelatos e micropoemas. Eles e elas van asistir á Festa das Palabras, no teatro Principal, para recibir unha copia do libro que contén todos os traballos gañadores da man de Rosalía Morlán, a madriña deste ano.  Noraboa a todos/as!!

Poemas: 

A1: A chuvia. Rubén Collazo Mesego. 2º.

A2: Ignacio Eiras Alonso. 4º.

A3: Sara Sanín Gómez. 6º.

Relatos:

A1: Martina Magariños Freire. 2º.

A2: Clara Otero Ferreiro. 3º

A3: Alma Díaz Martínez. 5º.

ILUSTRACIÓN DO POEMA DE ROSALÍA

 Ademais da actuación de Manoele de Felisa, este ano, como vén sendo habitualmente, ilustramos un poema de Rosalía de Castro, neste caso, de Cantares Gallegos:

DÍA DE ROSALÍA NO TEATRO PRINCIPAL

Aroa Lorenzo e Aroa Pereira  recitaron no Teatro Principal este poema de Rosalía de Castro:

Nasín cando as prantas nasen

Nasín cando as prantas nasen,
no mes das froles nasín,
nunha alborada mainiña,
nunha alborada de abril.
Por eso me chaman Rosa,
mais a do triste sorrir,
con espiñas para todos,
sin ningunha para ti.
Desque te quixen, ingrato,
todo acabóu para min,
que eras ti para min todo,
miña groria e meu vivir.
¿De qué, pois, te queixas, Mauro?
¿De qué, pois, te queixas, di,
cando sabes que morrera
por te contemplar felís?
Duro cravo me encravaches
con ese teu maldesir,
con ese teu pedir tolo
que non sei qué quer de min,
pois dinche canto dar puden
avariciosa de ti.
O meu corasón che mando
cunha chave para o abrir.
Nin eu teño mais que darche,
nin ti máis que me pedir.

Cantares Gallegos

Que ben o fixeron as nosas compañeiras! Parabéns!

DÍA DE ROSALÍA CON MANOELE DE FELISA

 O Día de Rosalía celebrámolo por todo o alto no noso colexio! Estivo con nós o músico Manoele de Felisa. Primeiro pasou polas aulas de EI, despois fixo unha pequena actuación para os cursos de 1º, 2º e 3º e, por último, os de 4º, 5º e 6º bailaron e cantaron as súas fermosas cancións que estiveron basadas,sobre todo, na figura de Rosalía de Castro.Que ben o pasamos con este magnífico artista!

Antes de rematar, Aroa Lorenzo e Aroa Pereira recitaron ante todos un poema que crearon na súa clase cos corazóns de Luna dos que falamos en anteriores actividades.

Ata sempre, Manoele!

OS CORAZÓNS DE XOSÉ LUNA

 A finais do curso pasado estivo con nós  o escritor estradense Xosé Luna. Deixounos no cole, ademais da lembranza dunha agradable e proveitosa visita, unha chea de corazóns de madeira cunha palabra dalgunha das súas obras escrita no seu interior. Con eles, para conmemorar o día da candeloria fixemos unha chea de versos, cada clase un poema. Dalgunhas palabras non coñeciamos o significado e buscalo no dicionario foi tamén unha actividade enriquecedora. Que ben quedaron! Grazas, amigo Luna!

BASES DO CONCURSO CAN VALENTÍN

Aínda tendes ata final de mes para escribir as vosas cartas. Animádesvos?

Alá imos!

 

NO NIÑO NOVO DO VENTO - CUNQUEIRO

Para festexar o Día da Candeloria escollemos este poema de Álvaro Cunqueiro. Cada clase escribirá un verso do mesmo e entre todos faremos unha composición para colgar na entrada do colexio. Feliz Día a tod@s!

No niño novo do vento
hai unha pomba dourada,
meu amigo!
Quén poidera namorala!

Canta ao luar e ao mencer
en frauta de verde olivo.
Quén poidera namorala,
meu amigo!

Ten áers de frol recente,
cousas de recén casada,
meu amigo!
Quén poidera namorala!

Tamén ten sombra de sombra
e andar primeiro de río.
Quén poidera namorala,
meu amigo!

ÁLVARO CUNQUEIRO. Cantiga nova que se chama Riveira, en Obra en galego completa, Vigo, Ed. Galaxia, 1980.

Picade neste enlace para poder escoitar o poema.

No niño novo do vento- Luis Emilio Batallán 

Mirade que ben quedaron os traballiños que fixemos: